Նախարարների կոմիտեի նախագահություն. Հայաստանը հաջորդեց Անդորրային

16 մայիսի, 2013

Ստրասբուրգ, 16 մայիս 2013թ. – Այսօր Ստրասբուրգում, Անդորրայի Արտաքին գործերի նախարար Ժիլբեր Սաբոյա Սունյեի նախագահությամբ կայացավ Նախարարների կոմիտեի 123-րդ նստաշրջանը: Հանդիպման ավարտին Նախարարների կոմիտեի նախագահությունը Անդորրայից փոխանցվեց Հայաստանին:

Նախարարները հիմնականում քննարկումներ ծավալեցին ժողովրդավարության, մարդու իրավունքների եւ օրենքի գերակայության ոլորտներում Եվրոպայի Խորհրդի գործունեության արդյունավետության բարձրացման վերաբերյալ Գլխավոր քարտուղարի զեկույցի շուրջ: Նրանք Գլխավոր քարտուղարին քաջալերեցին շարունակել ջանքերը կազմակերպության վերահսկողական մեխանիզմների գործունեության եւ համակարգման օպտիմալացման ուղղությամբ՝ հետեւելով, որպեսզի այդ ատյանների եզրակացությունները լավագույնս կիրառվեն: Այդ նպատակով, նախարարները Գլխավոր քարտուղարին խնդրեցին իրենց ներկայացնել Եվրոպայում ժողովրդավարության, մարդու իրավունքների եւ օրենքի գերակայության իրավիճակի վերաբերյալ վերահսկողական մեխանիզմների եզրակացությունների վրա հիմնված պարբերական զեկույցներ՝ գործողությունների կոնկրետ առաջարկներով:

Հանդիպման օրակարգում ընդգրկված էին նաեւ Եվրոպական Միության հետ համագործակցության եւ հարեւան տարածաշրջանների հանդեպ Եվրոպայի Խորհրդի քաղաքականության հարցերը:

Նստաշրջանի ընթացքում Նախարարների կոմիտեն հաստատեց Մարդու իրավունքների եւ հիմնարար ազատությունների պաշտպանության մասին Կոնվենցիայի 15-րդ արձանագրությունը: Արձանագրությունը անդամ երկրների ստորագրության համար կբացվի 2013թ. հունիսի 24-ին:

Հայաստանը Նախարարների կոմիտեի նախագահությունը կիրականացնի առաջիկա վեց ամիսներին:

Եվրոպայի խորհրդի նախարարների կոմիտեում Հայաստանի նախագահության գերակայությունները․ ՀՀ Արտաքին գործերի նախարար, ԵԽ նախարարների կոմիտեի նախագահ Էդվարդ Նալբանդյանի ելույթը ԵԽ նախարարների կոմիտեի նիստում

Հայաստանի ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր