Հայոց ցեղասպանության 108-րդ տարելիցին նվիրված միջոցառում Ստրասբուրգում

24 ապրիլի, 2023

Ապրիլի 24-ին Ստրասբուրգում՝ «Մեր զոհերը» հուշարձանի մոտ, տեղի ունեցավ Հայոց ցեղասպանության 108-րդ տարելիցին նվիրված հիշատակի արարողություն՝ Եվրոպայի խորհրդում Հայաստանի մշտական ներկայացուցիչ, դեսպան Արման Խաչատրյանի, Հայաստանի Ազգային ժողովի նախագահի տեղակալ, ԵԽԽՎ-ում Հայաստանի պատվիրակության ղեկավար Ռուբեն Ռուբինյանի, Ստրասբուրգի քաղաքապետ Ժանն Բարսեղյանի, ԵԽԽՎ-ում Հայաստանի պատվիրակության անդամների մասնակցությամբ։

Դեսպան Խաչատրյանն իր ելույթում ընդգծեց Հայոց ցեղասպանության ճանաչման ու ժխտողականության դեմ պայքարի կարևորությունը։ Նշեց, որ անպատժելիությունը հիմք է ստեղծում մարդկության դեմ նոր ծանր հանցագործությունների՝ այս համատեքստում անդրադառնալով 2020թ. սեպտեմբերին Ադրբեջանի կողմից Արցախի դեմ սանձազերծած պատերազմին, ինչպես նաև արդեն չորս ամիս շարունակվող Լաչինի միջանցքի արգելափակմանը։

Ցեղասպանության նահատակների հիշատակին հարգանքի տուրք մատուցեցին և ելույթներ ունեցան նաև քաղաքապետ Ժանն Բարսեղյանը և Ստրասբուրգի հայ համայնքային կառույցների ներկայացուցիչները։

Ներկաները ծաղկեպսակներ զետեղեցին հուշարձանի մոտ՝ մեկ րոպե լռությամբ հարգելով Հայոց ցեղասպանության զոհերի հիշատակը։

Հայաստանի ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր