Հայկական ֆիլմի ցուցադրություն Ֆրանկոֆոնիայի ավանդական երկամսյակի շրջանակներում

25 մարտի, 2026

Ֆրանկոֆոնիայի ավանդական երկամսյակի շրջանակներում Եվրոպայի խորհրդում Հայաստանի Հանրապետության Մշտական ներկայացուցչության նախաձեռնությամբ ս․թ․ մարտի 25-ին Եվրոպայի խորհրդի կինոդահլիճում ցուցադրվեց հայ նշանավոր կինոռեժիսոր Հենրիկ Մալյանի «Մենք ենք, մեր սարերը» ֆիլմի թվայնացված տարբերակը՝ ֆրանսերեն ենթագրերով։

ԵԽ-ում ՀՀ մշտական ներկայացուցիչ, դեսպան Արմեն Պապիկյանը բացման խոսքում մասնավորապես նշեց, որ հայկական կինեմատոգրաֆիայի գլուխգործոցներից մեկի՝ ավելի քան կես դար առաջ ստեղծված «Մենք ենք մեր սարերը» ֆիլմի ցուցադրությունը մարդու իրավունքների և ժողովրդավարության ոստան հանդիսացող Եվրոպայի խորհրդի կենտրոնակայանում պայմանավորված է կինոնկարում բարձրացված համամարդկային թեմաներով։ Նուրբ հումորով համեմված Հրանտ Մաթևոսյանի վիպակը՝ Հենրիկ Մալյանի էկրանավորմամբ, վերածվել է խորը հումանիզմի մասին փիլիսոփայական մտորումների և ուղերձի։ Այն հիշեցնում է համընդհանուր արժեքների և համակեցության ոգով խնդիրներն ու տեսակետները երկխոսության և փոխըմբռնման միջոցով մերձեցնելու և կառուցողական երկխոսությանն առաջնահերթություն տալու կարևորությունը՝ արժեքներ, որոնք պաշտպանում և առաջխաղացնում են թե՛ Եվրոպայի խորհուրդը և թե՛ Ֆրանկոֆոնիան։

Ցուցադրությանը ներկա էին ԵԽ անդամ երկրների դեսպաններ, դիվանագետներ, ԵԽ աշխատակիցներ։

Ֆիլմի ցուցադրությունը կազմակերպվել է Հայաստանի կինոյի հիմնադրամի հետ համագործակցաբար։

Հայաստանի ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր